عادات اهل مكة في الأكل......

--

الأكلات المكاوية لها طعم ونكهة ونشأة
واللي تحلي الأكلات وتطعمها زيادة إنو لكل أكلة مناسبة تتعلق بيها
وما ناكلها إلا في المناسبة حقتها
نحنا كدة المكاوية وبالزات العتقية القدم لنا تصانيف وتباتيك في الاكل والشرب مايعلم بيها الا الله عز وجل
ماشية معانا من أيام ما فنو الأوادم

أقروا الهرجة ومخمخوا وبعدين قولوا رأيكم عن هادي العادات

والأكلات المكاوية ترتبط بعادات ومناسبات يعني كل اكلة ولها مناسبة زي ايش ؟؟؟

هيا خدو عندكم ....

1/الرز البحمص والسقط والمعرق أو المختوم والششني هادي الأكلات خاصة بالعزا وزيادة في التوضيح
اليوم الأول والتاني والتالت يطبخو الرز البحمص واليوم التالت اللي يسموه قطع العزا يسوو الششني والمعرق والمختوم والسقط ..

2/الكابلي أو الزربيان والسمبوسك والطرمبة هادي يسووها وقت المناسبات والأفراح للرجال

أما الحريم يجيبولهم البوفيه طبعا زمان أول مافي لا بوفيه ولا يحزنون ياكلو من نفس أكل الرجال بس يسووقليل بريك او بف بالجبنة والا باللحمة شغل بيتي يعني واللي تعرف تسوي كيك بالبرتكان او الموز تسوي صينية علشان يحلو بيها
بعدين فن علينا البوفيه والشغلات الجديدة هادي ..

3/المعدوس ( الرز وعدس ) هادا يسووه المكاكوة يوم الغيم والمطر ومعاه روبيان مكشن بالطماطم والبصل والفلفل الأخضر وسلطة حمر
وكيف لو كنا ساكنين في بلاد الخواجات على كدة كل يوم معدوس الين البطن تسير زي الطبلة

4/الملوخية الخضرا هادي تتعمل في اليوم الأول من السنة الهجرية الجديدة على الغدا من باب التفائل إنو ربنا يجعلها سنة خضرا وخير للجميع

5/الحليب أبو الهيل هادا برضو كمانة ينشرب في صباحية أول يوم في السنة الهجرية الجديدة
6/السليق هادا يسووه في المناسبات لمن يكون الجو باااااااااااااااااارد زي هادي الأيام

7/الدبيازة والمنزّلة معروفة على ما أعتقد للجميع يسووها للفطور أول يوم العيد

8/المعمول والغريبة يسووها في أيام الحج

9/السمك مايتاكل إلا في الشعبنة علشان في رمضان
الناس ماتاكل السمك بس هيا كدة عادة
شعبنة يعني اضرب سمك وصيادية
10/عشرة عاشورا ( 10 محرم ) رز زربيان الحلو
وسلطة لبن أبو الفلفل
11/السحلب يسووه في الأيام الباردة زي دحين علشان يلم العضم ويدفي الجتة بالزات لو فيلو شوية جنزبيل

12/القهوة الملوزة اللي يحطولها لوز بجلي مهروش طبعا هادي وقت البزورة ما ينجحو والا يسقطو يسوولهم هيا قيد ماتفرق
لو البيت فيلو خمسة بزورة ناجحين وتلاتة صاقطين رايحين يلغو القهوة الملوزة

13/وغير أكلات رمضان الخشاف والماسية ومكارنة باللبن إزا تعرفوها والقطايف هادي ياكلوها من السنة للسنة

14/المجلب ( مجموعة أعشاب مخلوطة عن العطارين ) زماااااان ويمكن دحين مافي حرمة تنفس وتولد إلا يصنجوها مغراف مجلب علشان يكرت وصخ البطن والولادة وينضفها

15/ الزلابية واللقيمات ( اللنقطة ) أول ما ينقال اسمها نتزكر العيد والفطور حق العيد

16/ السلاتي والمقلقل واللحم نفتكر على طول عيد الحج يندبح الطلي ومايبقى شي منو تبارك الرحمن
كل شي يتاكل فيه الين الرجول يسوو بيها مقادم والمفاصل نلعب بيها كبوش والجلد يفرشوه على عتبة البيت زي الدعاسات دحين والديل نشوح البزورة بيه زي البواكير
ههههههههههههه

زي ماشفتو الأكلات اللي قلنا عليها لها مناسبة أو وقت معين تتاكل فيه
مع انو يمدينا ناكلها طووووووووووول السنة مو مشكلة ويمكن كتير ناس هجروا
وفلتو تباتيك زمااان الا مارحم الله بس هيا زي ماتقولوا شغلة تعود

anoOs

هههههههههههههههههههههههههه

يسلموووووووووووووو

ههههههههههههههههههههههه

يا راجل الكلات هدي يسوها عندنا وما اكل منها غير السليق

اما الرز البخاري وبس واذا باللحم اطعم من الدجاج يعطيلوا نكهة خاصة

يسلموووو انوس على الموضوع

هههههههههه بالعافية

يسلمو على مروركم الحلو
منورين موضوعي

يسلموووووووو يا انس

بس منجد فيهبعض اكلات اول مرة امع فيها
هادا وانا من مكه

ههههههههههههههههههههههه

يلا مشي حالك

يعطيك العافيه مرة موضوع خطير

خلاص اسالي ستك عنها وشوفي
هههههههههههههههههههههههههههههههه

يسلمو بسمة على مرورك
منورة موضوعي